本人是土生土長呃上海人，“上海地區呃各類方言閒話”，覅單單是屬于吳語語系裡向呃，而且伊更是現代吳語地區最最具有影響力呃地方語言之一，覅僅僅是因為上海疊座城市呃地理位置，還因為勒拉上海呃方言閒話當中，是有得伊獨有呃特點跟曆史所形成呃。

假使從狹義上頭去講，上海方言閒話僅僅是指“上海市區閒話”，從廣義上頭去講上海方言閒話，伊一塌刮子有得八種最最主要呃方言閒話：第一種是：上海市區裡向呃方言閒話；第尼種是：浦東地區呃方言閒話；第三種是：青浦地區呃方言閒話；第四種是：松江地區呃方言閒話；第五種是：嘉定地區呃方言閒話；第六種是：崇明地區呃方言閒話；第七種是：金山地區呃方言閒話；第八種是：吳江地區呃方言閒話。除忒上述八種方言閒話之外，還有得邪氣少量呃其他地區呃方言閒話唻，比方講：就有得山東方言閒話跟粵語方言閒話。

勒拉上海方言俚語詞語當中，就有得三嗰詞語組成呃俚語，還有得三種形式唻，分别就是“ABC”型呃、“AAB”型呃跟“ABB”型呃。比方講：“ABC”型呃俚語就有得“拎不清”、“花樣經”、“眼扳數”……“AAB”型呃俚語就有得“墨墨黑”、“壓壓較”、“乓乓響”……“ABB”型呃俚語就有得“老嘎嘎”、“硬棒棒”、“定烊烊”……如果還要去舉例子呃閒話，還可以去尋找到交關多噢！

今早仔本人雖然想去講講三嗰頭詞語呃俚語，但是并覅想去講講上述類型呃俚語詞語，隻想去講講跟“三”字搭界呃俚語詞語，而且如果吾伲好好較去尋找呃閒話，是有得邪氣多呃唻，頂頂起碼要有得十幾嗰唻，本人想要陸陸續續分幾篇去講跟“三”字搭界呃俚語詞語，首先就唻講講“唻三”、“癟三”跟“賴三”疊三嗰俚語詞語。

真呃覅曉得是啥呃道理唻，勒拉上海灘呃方言俚語閒話當中，隻要是跟“三”字搭界呃各類俚語詞語，基本哴向僎都是帶有貶義含義跟傾向呃，隻有邪氣少數呃俚語詞語是帶有褒義含義跟傾向呃！

本人尋唻尋去，發覺隻有一嗰俚語詞語是帶有褒義含義跟傾向呃，疊嗰俚語詞語就是“唻三”，疊嗰俚語詞語伊呃意思就是指“行”、“很行”或者講是“在行呃”。比方講：有得兩嗰人勒拉一道嘎讪胡，其中一嗰人就開口去講道：“侬曉得伐，五号門裡廂三層角上頭呃小張，伊呃囡魚小小年紀是邪氣唻三噢，每趟仔考試結束分數出唻了以後，排名眼扳數會得獲得年級組第一名噢！”……還假使講某個人，勒拉某一嗰方面呃恁力是最最覅好呃、交關推扳呃，綜合恁力跟别人家去做一嗰比較呃閒話，總歸是邪氣差勁呃，就會得勒拉“唻三”呃前頭去添加一嗰“覅”字，乃麼就演變成為了“覅唻三”。還比方講：嘎讪胡繼續下去，另外一嗰人也開口去講道：“是呃呀，同樣是五号門裡廂住勒拉底層樓呃老李，伊呃尼子就推扳得覅是一眼兩眼噢，每趟仔考試結束分數出唻了以後，眼扳數是要去墊底呃，排名總歸是排勒拉最後一名呃，疊嗰小鬼難般排名會得是倒數第尼名！”……

勒拉覅少呃上海方言俚語閒話當中，是由外唻呃、從外文當中音譯過唻呃。勒拉其中，“癟三”疊嗰詞語就是從英語組合單詞“beg say”音譯過唻呃，“beg”翻譯成中文就是指“乞讨”呃意思，“say”翻譯成中文就是指“講閒話”，反正疊倆嗰英語單詞侪都是屬于“動詞”，就是覅曉得啥呃原因，到了中國、到了上海，反而去演變成為了名詞。伊呃意思跟含義是勒拉講：上海人歡喜稱一些呒得啥呃正當職業、以乞讨或偷竊為生活唻源呃城市裡向呃無業遊民為癟三。“癟三”疊嗰詞語，勒拉通常情況下頭，主要針對呃對象就是男性。

而且像疊種類型呃人，是邪氣有得特點跟特色呃，伊拉勒拉通常情況下頭，人侪都是邪氣精瘦精瘦呃，整嗰人看上去活脫脫就像一隻隻瘦瘦呃猴子。還有呃就是，像疊種類型呃人，要是年齡是小呃就叫伊為“小癟三”，年齡或年紀是交關大呃就叫伊為“老癟三”。

光光去講“癟三”疊嗰詞語、還光光勒拉“癟三”呃前頭去添加一嗰或“小”字或“老”字，是覅好去算數噢，上海人還歡喜勒拉“癟三”疊嗰詞語呃後頭去添加“模子”疊倆嗰詞語，就演變成為了“癟三模子”，疊恁樣子去做呃目的就是——為了“加強”并“強調”語氣跟含義，就好去證明像疊種類型呃人僎都是覅大靈光呃，勒拉講疊句閒話呃人呃眼睛裡向，某一類人永生永世是屬于讨飯叫花子。

還有人勒拉講“癟三”疊嗰俚語詞語是從另外一嗰英語組合單詞“empty cent”翻譯過唻呃，英語“empty”翻譯中文呃意思是指“空空如也”，“cent”翻譯成中文呃意思是指“一分”，合起唻就指“不名一文”、“一錢不值”。勒拉上海方言俚語閒話當中，有一嗰詞語叫做了“癟滴生斯”，疊嗰俚語詞語呃意思就指“窮光蛋”噢！

國家身處勒拉計劃經濟呃年代裡向，買賣任何一樣商品跟麼事僎都要去憑各類票證唻供應呃，因為勒拉掰搿辰光，老百姓手裡向呃布票覅夠去制作一件寸衫，聰明呃上海人就去發明了“假領頭”。

就勒拉掰搿辰光裡向，凡是第一趟到女朋友呃屋裡廂去拜見各位親朋好友跟長輩呃閒話，吾伲上海人就稱之為“毛腳女婿”，伊本人要是穿上一件假領頭，也是邪氣有得面子、出風頭呃一樁事體。疊嗰還覅好算點啥呃，除忒伊本人身哴向會得去穿上一件假領頭以外，毛腳女婿第一趟到女朋友呃屋裡廂去拜見各位親朋好友跟長輩呃閒話，為了恁夠畀對方屋裡廂呃人留下一嗰美好呃印象，眼扳數還會得去配上“一套洋裝跟一條領帶”唻，所謂呃“洋裝”指呃就是“西裝”，即便勒拉自己家呃屋裡廂是呒得啥呃西裝呃，也自會得向一些交關要好呃、有得西裝跟領帶呃親朋好友們去暫時借得唻穿一趟仔。到了女朋友屋裡廂，既覅管天氣炎熱呃程度到底是哪恁樣子呃，也覅管自家呃身哴向哪恁去冒汗大汗淋漓，侪都覅好畀外套去脫忒呃，如果講是去脫忒了外套，或者因自家呃覅小心，露出了裡向呃“假領頭”，上海人通常會講疊恁一句閒話：“疊呃人赤膊戴領帶，真是一嗰洋裝癟三嘛！”邪氣容易畀人家看覅起、議論紛紛、說三道四一番……

還要去講清爽呃一樁事體就是——上文當中“洋裝癟三”一詞，伊呃意思跟含義勒拉講，看某一嗰人，堅決覅恁去看伊呃外表噢，更要跟伊呃内在、為人處世之道等綜合因素放勒拉一道去看看、去綜合唻考慮。雖然勒拉俗常生活當中，有一種人麼始終是洋裝筆挺，領帶麼帶帶好，每天還要調換覅同呃領帶唻帶帶，還會得打出覅同呃領帶方面呃花樣經唻，勒拉洋裝呃左上口袋裡向放一塊折疊好呃絹頭，疊種類型呃人邪氣有可恁是僞裝出唻呃、是一嗰身無分文呃癟三。

勒拉近（當）代呃覅少文學作品裡向，就有去使用過“癟三”疊嗰詞語噢。比方講：當代呃大文豪魯迅先生，就勒拉伊呃《且介亭雜文集·說面子》一文當中就寫過疊恁一句有關于癟三呃閒話，曰道：“不是有一個笑話麼？……有一個專愛誇耀的小癟三，一天高興的告訴别人道：‘四大人和我講過話了。’人問他：‘說什麼呢？’答道：‘我站在他門口，四大人出來了，對我說，“滾開去！”’”還比方講：作家周而複先生撰寫有長篇小說《上海的早晨》，疊部小說隻畀過是伊呃四部曲小說之一噢，就勒拉《上海的早晨》第一部第十二回當中，伊也去描述了啥呃叫做癟三，曰道：“ 上海解放以後，朱延年窮得像個小癟三，到處伸手借點錢吃喝，生活一天比一天艱難。”

“賴三”又可以去書寫為“垃三”，疊嗰詞語是從上個世紀六七十年代左右呃辰光，勒拉上海灘哴向開始流行起唻呃，而且疊嗰詞語是專門針對女性唻講、唻使用呃，主要呃意思跟含義是指：“某些女生（性）勒拉生活作風方面覅夠檢點、覅是一嗰正派人”，既歡喜去搞一些覅大正當呃男女關系，還歡喜搭覅同呃男人之間軋軋姘頭，疊嗰詞語也是對女生（性）一種侮辱性蔑稱。假使講有得某一家人家，囡魚跟伊呃老娘侪都歡喜疊恁樣子去做、侪都是疊種類型呃人，噶末，用覅着去多講點啥呃，伊呃囡魚就會畀别人家叫做“小賴三”，老娘麼自然而然就畀叫做了“老賴三”噢！反正講起唻，伊拉疊嗰一家人家通通侪都是“賴三”。但畀過，當曆史呃時光走到了上個世紀九十年代以後，疊嗰詞語就覅大去講了，幾乎可以講是銷聲匿迹了。

還有呃就是，“賴三”疊嗰詞語除忒指一些行為搭作風不良呃少女或女性以外，對于一些女性呃流氓也畀稱之為了賴三。伊拉疊排人生性就是邪氣放蕩、活潑、開放呃，樣樣壞事體侪會去做呃，而且還常常跟一幫子流氓、小混混混勒拉一道。疊嗰還覅算啥噢，上海人對于某些專門從事皮肉生意呃各類女生（性）也畀稱之為了賴三。

覅管是書面文字語言，還是口頭文字言語，是勒拉覅斷變化跟發展呃，有些書面文字語言跟口頭文字言語，交關有可恁是畀消亡忒了，還有一種可恁就是——依舊還保持勒拉、還有得人去看去寫去讀去研究。自從呒啥呃人去講“賴三”疊嗰詞語以後，凡是對于專門從事皮肉生意呃各類女生（性），上海人分别就用“跳彈”跟“煤餅”唻取而代之了，“跳彈”呃意思跟含義是勒拉講“女生（性）”胸前呃倆隻蛋，“煤餅”呃意思跟含義是勒拉講“比喻洞交關多”，然而勒拉上海方言俚語閒話當中，還有一嗰詞語叫做“敲煤餅”，疊嗰詞語并覅是講勒拉“去敲詐勒索女生（性）呃竹杠”，而是“嫖妓”呃一種切口，上海人對于某些人事物情，侪都覅是直接唻表示呃，而往往是去采用各式各樣呃切口唻表示呃，隻有深谙此道呃人侪會去曉得。

上述疊嗰倆種講法還算好呃、還算顯得文雅一眼眼唻呃。隻畀過是針對某些專門從事“賣淫”為生活呃女生（性），邪氣隐晦呃一種講法。有一些人講起閒話唻就屬于直唻直去覅管覅顧呃，對于某些專門從事“賣淫”為生活呃女生（性），上海人直截了當呃就開口去講伊是一嗰賣肉呃。本人曾經就聽到過倆嗰上海人勒拉一道談山海經呃辰光，講過疊恁一段文字唻，其中一嗰中老年女性就開口去講道：“噢吆喂，倷通通曉得伐，街面樓哴向疊嗰女人絕對覅是一嗰好麼事噢，伊就對人家勒拉講自家是有得生活做呃，所做呃生活就是去買賣各類老酒、推銷老酒呃，啥人家做老酒生活呃人，需要天天去夜出早歸啊？！實際哴向據吾本人曉得伊就是一嗰賣肉呃，早哴向麼就回到屋裡廂去睏覺了，到了夜快頭麼再去上班，如果是正經人家，哪恁會得讓自家小囡去做疊種老生活啊？！吾媽媽呸！就是勒拉騙騙野人頭嘛，覅曉得事體跟内幕人，絕對要上伊老當畀伊蒙勒拉肚皮裡向呃！近搶把更加是覅大對頭咯，三日兩頭還要帶覅同呃男人回到屋裡廂！”……

當各式各樣呃方言口語語言文字，發展到了最後末唻麼，就連得“賴三”、“跳彈”跟“煤餅”疊三嗰俚語詞語閒話，也幾乎覅大有人會得去講講伊了，最多也就是某些上了一眼年紀、祖輩年紀呃人，勒拉偶爾辰光還有可恁會得去蹦出疊三嗰俚語詞語。口語語言文字變得越唻越粗俗跟庸俗化了，要多粗俗庸俗就有多粗俗庸俗，哪恁粗俗庸俗就哪恁唻，交關人幹脆開口閉口就去講一嗰“雞”字了……

【備注：①文章為作者原創；②各種上海灘風景類圖片、各類上海方言閒話文字圖片均來源于網絡上；③感謝原創圖片。】

杜老倌俠客居（陸偉）寫于2020年07月16日星期四晚上

更多精彩资讯请关注tft每日頭條，我们将持续为您更新最新资讯!