因為疫情一直蹲勒屋裡出勿去，儲備蔬菜是絕大多數家庭無法繞開個選項，其中，老蔔是要也要、勿要也要個重要品種，阿拉有充分理由接受伊。

“冬吃老蔔夏吃姜”個熟語告訴大家：老蔔是冬令蔬菜。葛末，現在已是暮春，阿拉吃個老蔔好像搭冬老蔔無關了？其實勿對個。老蔔個成熟期覆蓋一年四季，春老蔔勒5月-7月之間，夏老蔔勒7月-8月之間，秋老蔔勒9月-11月之間，冬老蔔勒12月到來年1月-2月之間。所以麼，阿拉搿歇吃到個老蔔，可能還勒勒承接冬老蔔個餘緒唻，講伊“正當時”麼，勿靠譜，講“反季”麼，像煞是也勿搭界。

坊間另外有句“老蔔上市，郎中下崗”個講法，估計按照目前個形勢，假使有人還秉持叠個執念，讓“大白”靠邊，乃末就要讓大家笑話了。

必過呢，老蔔是傳統藥菜，伊個營養價值勿一定輸撥人參，古代醫典記載得邪氣多，此地勿需要啰嗦了。所以，各家各戶盡管老蔔“造造反反”，但是侬勿去“招安”伊，是勿講道理個。

用老蔔燒菜可以有交關種燒法，譬如講，高級點個鮑汁老蔔，普通點個蔥油老蔔絲，諸如此類，相信勿少人老老熟悉個。

交關人勿曉得老蔔還可以當飯。北宋楊億《楊文公談苑》裡向記載:

江東居民，歲課種藝，初年種芋三十畝，計省米三十斛；次年種老蔔二十畝，計益米三十斛，可知老蔔消食也。更始敗，掖庭中宮女數百人幽閉殿門内，掘庭中蘆菔根食之，今老蔔是也。

英國作家笛福勒《魯濱遜漂流記》裡向也寫到了類似個故事：

我有一包鈔票，金币也有，銀币也有，大約摸值三十六金鎊。但是，搿些倒黴個、沒用個物事，至今還擺勒伊面，對我一點用場也呒沒；我常莊想，我情願用一大把鈔票去調……價值六便士個英國萊菔（就是老蔔）搭紅老蔔個種子……

由此觀之，特殊個辰光，老蔔賽黃金，真個勿是瞎講八講，勿拿老蔔當樁事體是極其錯誤個。

時至今日，老蔔當飯簡直“天方夜譚”了，必過，侬哪能曉得自家絕對勿會是下一個“魯濱遜”呢？

勒目前手邊食材調配勿夠充分個場景之下，一日到夜重複個老蔔菜确實有點吃厭脫了，叠個辰光，老蔔點心可以跟進，一方面調調口味，一方面物盡其用，何樂而不為？老蔔絲油墩子、老蔔絲煎餅、老蔔絲酥、老蔔絲蟹殼黃……此時此刻，想起伊些平時勿起眼個小點心，饞唾水溚溚渧了呀。遺憾個是，搿些點心油水過重，難免為人忌憚。葛末，是勿是可以嘗試吃吃老蔔糕呢？

網浪向有各式做老蔔糕個攻略，路數勿外是——大米磨成功米漿；老蔔刨成功細絲燒熟，臘肉、臘腸切成功細粒，開洋用油炒香，再加各種調料，趁熱倒入米漿裡向；攪成糕坯之後用蒸籠蒸；期間可以勒糕個表面浪向撒眼開洋搭仔臘肉個碎碎；續蒸之後晾一晾，冷下來切塊，蘸點蒜蓉醬油品嘗。

看起來并勿複雜。

值得一提個是：老底子勒廣東、福建伊面流行個老蔔糕，對米粉個要求邪氣高，非“在來米粉”勿用。

所謂“在來米粉”，是一種粘性比較大個粳米粉。

假使實在弄勿到“在來米粉”，我想糯米裡向加點粳米應該可以将就個伐。

老蔔糕看上去流派邪氣多，廣式、閩式、台式、港式咾啥，但是基本浪大同小異，萬變勿離其宗：粘米、臘肉、開洋。我最欣賞開勒上海前灘太古裡旁邊、專營正宗順德菜個“山海潮”出品個老蔔糕，伊拉個特點是精緻考究，人有我有，我有人無，譬如導入瑤柱，再譬如表面撒白芝麻，又譬如配秘制蒜蓉辣椒醬……尤其是伊用馬蹄粉來替代粘米粉，顯得别出心裁，風味獨特，令人難忘。

毫無疑問，老蔔糕是一味點心；而對我來講，則是一道菜。沒錯，我從來呒沒拿伊當作點心：鹹滋滋、鮮葳葳、嫩生生、滑溜溜、軟咚咚、香咪咪，佐酒過粥，無不惬意。事實浪，粵閩港台地區個一些菜，常莊請老蔔糕加持，啥個老蔔糕湯、xo醬老蔔糕、芥蘭炒老蔔糕……熱鬧非凡。

老蔔糕個“前世”材料少見少有；就算有，恐怕也勿容易配齊。我尋到南宋林洪《山家清供》裡個一條：

東坡一夕與子由飲，酣甚。槌蘆菔（就是老蔔）爛煮,勿用他料，隻研白米為糁。食之，忽放箸撫幾曰:“若非天竺酥酡，人間決無此味。”

粉碎個大米裡向摻進老蔔泥加以烹饪，我猜，勿就是老蔔糕個雛形嘛？

呵呵。疫情當前，既能健體又可果腹個老蔔糕是可以左右逢源個；并且，阿拉還真個要跟老蔔學一學——“一隻老蔔一隻坑”——保持恰當個社交距離，讓新冠病毒早點滾蛋伐！

作者：西坡

講述：何秀萍

丁迪蒙

迪蒙，啟迪蒙昧者也。上海市人。原上海大學中文系教師，多年來一直緻力于滬語和海派文化的傳承。

滬語是吳方言的代表方言，是吳侬軟語的典範。她既可以用來拉家常，也同樣可以用來朗讀各類詩歌散文。

滬語完全可以書寫，同粵語可以寫作是一樣的。本平台所有文章都是經過改寫後，用滬語來演繹的，漢字書寫也是正确的。

丁迪蒙所撰寫的，與滬語相關的著作主要有：

《學說上海話》上海科技文獻出版社

《聽聽說說上海話》少年出版社

《實用滬語》複旦大學出版社

《上海話繞口令》少兒出版社

《上海方言詞語使用手冊》上海教育出版社

《上海話讀成語故事》少兒出版社

《囡囡學童謠》，少兒出版社。

更多精彩资讯请关注tft每日頭條，我们将持续为您更新最新资讯!