上海話愛吃什麼?上海可以說是吃貨們的天堂，各色美食琳琅滿目，應有盡有但你知道嗎？上海話裡“吃”這個字的用處可大着呢你既能“吃飯”“吃菜”，也會被“吃生活”“吃頭塔”，還有最誇張的“我吃死你了”......讓我們來看看，在上海你可以“吃”到點啥~，現在小編就來說說關于上海話愛吃什麼?下面内容希望能幫助到你，我們來一起看看吧!

上海話愛吃什麼

上海可以說是吃貨們的天堂，各色美食琳琅滿目，應有盡有。但你知道嗎？上海話裡“吃”這個字的用處可大着呢！你既能“吃飯”“吃菜”，也會被“吃生活”“吃頭塔”，還有最誇張的“我吃死你了”......讓我們來看看，在上海你可以“吃”到點啥~

點擊上方收聽文章音頻

上海人個“吃頭勢”邪氣結棍，上海言話當中個“吃”，按上海言話個發音讀成“喫”（ qie如“切”音）。上海人個“吃頭勢”真是個老結棍個，好吃個要去吃，勿好吃個伊拉也要去吃。

我伲先來講講好吃個物事。

上海是移民城市，彙集了全國各地個民俗文化，特别是蘇、浙、徽個江南民俗。單講飲食小吃文化，上海就熔江南風味于一爐。老底仔，本地人賣擂沙圓、糖粥、熏腸肚子；蘇州人賣甘草梅子、鹽金花菜、小蝦米豆腐幹；甯波人賣鴨膀鴨舌頭、醉蟹黃泥螺；廣東人賣魚生粥、雲吞面……

勿僅如此，上海人一年四季侪辣辣吃：新春佳節吃年糕，清明吃青團，端午吃粽子，中秋八月半吃月餅，九月吃重陽糕，十二月初八吃臘八粥，冬至夜吃紅燒桂圓燒蹄髈，大年三十吃年夜飯......除了搿些“吃飯”、“吃菜”，上海人還會“吃香煙”、“吃老酒”。

上海人越吃越開心，越吃越有味道，乃末發散式個思維，開始“吃”一眼“看勿見、摸勿着”個物事了：吃價，吃香，吃癟，吃酸，吃藥，吃得開，吃勿消，吃功夫，吃體力，吃生活，吃頭塔，吃耳光，吃牌頭，吃擱頭，吃一拳，吃批評，吃軋檔，吃螺蛳，吃豆腐，吃大餅，吃小竈，吃下腳，吃灰塵，吃皮榔頭，吃生米飯，吃老米飯，吃木行飯，吃銀行飯，吃蘿蔔幹飯，吃辣貨醬，吃空心湯團，吃地段，吃房型，吃紅燈，吃伊漂亮，吃伊唱得好，吃硬檔，吃食堂，吃排檔，吃黑暗料理，吃老本，吃墨，吃紅筆——聽了上頭介許多個詞語，侬覺着，上海人“吃頭勢”阿是老老結棍啊？

辣上海言話裡向，吃個物事勿一定侪是好物事，上海言話裡拿“挨打”叫作“吃生活”，叠個“生活”個滋味就勿大好受了。小囡最怕做錯脫事體讓伊個阿爸曉得，因為阿爸常莊會威脅伊拉講，“小鬼頭，要是勿聽言話，當心撥侬吃生活”。

“生活”還分“檔次”，輕一眼個罰罰立，重一眼個“跪搓闆”、“吃耳光”，要是大人講，“請侬吃竹筍烤肉”，搿種啊算得上是“十大酷刑”之一了！

當然不是這種“竹筍烤肉”

千萬勿要以為搿是一道菜，所謂“竹筍烤肉”，就是用竹尺或者别個啥工具打屁股，“烤肉”個肉，自然是人肉，是脫脫褲子，直接打辣辣屁股個肉浪——用一道道風味勿錯個菜，來替代打屁股，上海人還是蠻噱頭個伐？

當然咾，要是侬爹爹火氣上來了，直接請侬“吃火腿”（上海言話：踢一腳）也是有可能個；假使“吃價”一眼，侬姆媽尋了外國人結婚，葛末，搿是檔次高眼，可以吃個是“外國火腿”（ 上海言話：撥外國人踢一腳），阿拉隻好“吃辣貨醬”了。

還有一種“吃”，一定勿是啥好物事：“吃牌頭”、“吃擱頭”搭仔“吃軋頭”。“吃牌頭”通常是指用辣上級或者長輩對下級、小輩批評個辰光。一般人也得會講“吃批評”，但是作為一個上海人，講“吃牌頭”、 “吃擱頭”搭“吃軋頭”，會得顯得更加本土。

講到上海人個“吃”，有一種“吃”，辣外地人聽起來“吓絲絲”個——“我老吃伊個！”。當年，談戀愛個小年輕相當流行搿能言話，一般個級别叫“吃伊（他／她）”，最高個級别就叫“吃煞伊（他／她）”——辣手伐？“吃”還勿夠，要“吃到死”！

經常會得聽到搿能講：“伊（他）對伊（她）勿要忒好噢，樣樣事體侪肯幫伊做個，有啥辦法啊，啥人叫伊（他）吃煞脫伊（她）了。”講個人覺着老自然個，而聽勿懂上海言話個人就像辣聽外國言話。雖然每個字侪曉得是啥個意思，但放辣辣一道，卻完全是一筆糊塗賬。

老底仔，王輝荃搭仔譚義存演出過一個著名個獨腳戲《上海小吃》，裡向對于上海男女青年個談戀愛總結個真是邪氣好笑，要是勿懂上海言話，還真個以為上海人是啥個侪能吃個：

“侬吃伊啥啦？”

“我吃伊獨養囡圄呀，還有海外關系；當然咾，我最吃伊個，是伊一隻番斯（意思是臉：英語face個音譯），㜺啊！”

老早仔，房子還勿是商品，葛咾，勿能買賣隻能調換，要是碰到幾個換房子個朋友，聽聽伊拉個對話也蠻有趣個：

“地段好，我吃伊地段”；

“我吃伊雙陽台”；

“我搭㑚勿一樣，我就吃伊衛生間，獨用，外加頂頂吃伊個，是一隻抽水馬桶，美國貨啊！”

一個“吃”是歡喜，是愛，要是兩個“吃”，搿就有另外一層意思了——千萬勿要對上海人講：“我老吃吃伊個”，搿是要成為笑柄個。“吃吃伊”是啥意思？就是欺負，貪人家小便宜，曉得伐？

上海人還歡喜拿工作叫做“飯碗頭”，有個穩定個工作就叫“鐵飯碗”，叫人眼熱（羨慕）個好工作就叫作“金飯碗”。相應個從事某一職業，就叫“吃搿行飯”。

有份好工作，又辣單位裡、社會浪混得好、路路通、受歡迎個叫“吃得開”，相反就是“吃勿開”。最受追捧搭注意個叫“吃香”，譬如講，某某職業交關紅火，上海言話裡就叫“某某行當老吃香”；當然，人或者商品也可以“吃香”，譬如“現在海歸勿吃香了，要MBA了”。

上海言話裡還有一個詞：“老吃老做”，講個就是為人，意思是一貫叠能做，通常是指對于勿好個事體老熟練個樣子，譬如，某小偷常常要到派出所報到個，人家就會講，“叠個人是常客，老吃老做了”。

好了，解釋了介許多個“吃”，哎，?看看叫，阿拉上海人個“吃頭勢”結棍？

資料：學上海話

改編：楊張悅

朗讀：牛美華

編輯：缪心

更多精彩资讯请关注tft每日頭條，我们将持续为您更新最新资讯!