小辰光聽老太太講，農曆大年初七是“人生日”，除脫要吃投生面、戴人勝（一種頭飾）、送火神、祈福納吉求平安，還要“囫囵吞赤豆”。後來，“囫囵吞赤豆”改成了“吃赤豆飯”，吃過赤豆飯還要稱體重，俗稱“稱人”。

　　記得有一年年初七，我中飯吃飽“赤豆飯”，又吃了一大碗菜湯，就辣屋裡等稱人。一歇歇，西閣爺叔拿出一杆大秤，挂辣客堂間個三步梁浪，阿拉小朋友看見了侪開心起來，邊跑邊喊：“稱人了，稱人了，快點來稱人！”一歇歇，老老小小來自交關。老太太腳浪穿蘆花靴，老公公腰裡束藍布裙，爺叔伯伯呼旱煙，阿婆阿娘紮鞋底，姑娘阿嫂嘻嘻哈哈也來看鬧猛。

　　小囡總是要搶先稱，一個個跨上門檻，雙手拉牢秤鈎，然後憋一口氣，雙腳一收，秤杆翹起，人就騰空了。看秤個爺叔快手快腳捋秤砣，看一眼秤杆浪個秤花，馬上喊出體重：某某31斤、某某43斤、某某52斤、某某某76斤……旁邊個大人就開始低聲議論：叠個小囡壯了，将來肯定是壯勞力；伊個小囡癟了，今年白吃飯了！

　　有一個懷孕個嫂嫂也想上去稱，被隔壁頭老姆媽拖牢，咬仔伊個耳朵講：“大肚皮稱勿得，當心養出小囡‘輕骨頭’。”嫂嫂聽了紅仔面孔退下來。

　　我兄弟姐妹多，屋裡經濟條件勿好，日腳過得緊緊巴巴。因為平常吃得勿好，我辣同齡人當中相當瘦小，我怕人家笑我“又矮又癟”，就辣褲袋裡向囥了兩塊石頭。呒沒想到，勿等爺叔喊出重量，我就因為拉勿牢秤鈎跌了一個屁股蹲，褲袋裡個石子“咕噜噜”滾了出來。我顧勿得屁股痛，連忙爬起來，一溜煙逃走，背後傳來一陣哈哈大笑……後來碰着大年初七，我吃過赤豆飯就跑出去白相，勿想參加稱人。

　　再後來國家改革開放了，阿拉一家門勤勤懇懇做生活，收入年年增加，家境逐步好轉，生活過得越來越紅火，兄弟姐妹侪長得勿錯，我也成了身強力壯個好勞力，再也呒沒人嘲笑我了。到了現在，平常日腳過得比老早過年還要好。生活好了，身體開始發福，我又擔心自家超重了。

　　翻翻最近幾年個《體檢報告》，我個體重侪超過70公斤，年年侪有“脂肪肝”個記錄。去年體檢辰光，醫生特别關照我要加強鍛煉。為此，辣幾個學生仔個慫恿下，我“八十歲學吹打”，拜學生為師傅，學跳交誼舞。呒沒想到效果邪氣明顯，三個月體重減脫5公斤左右，褲帶連縮幾扣，已經到了最後一格。老妻講：“人家講‘褲帶長，壽命短，有錢難買老來瘦’，老頭子啊，現在日腳叠能好，阿拉要争取多活幾年喲！”

　　到了現在，“大年初七稱人”已經成了遙遠個記憶。為了控制體重，女兒、孫囡，伊拉家家屋裡侪有電子健康秤，每天侪要稱一稱，勿但能夠精确稱量體重，還能智能分析胖瘦變化。發現體重稍微增加一眼，伊拉就要吃素減肥，還買了健身卡，三天兩頭去鍛煉。（周曙明）

更多精彩资讯请关注tft每日頭條，我们将持续为您更新最新资讯!